Lied 599

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. As Hy weer kom, as Hy weer kom,
kom haal Hy sy kinders;
al sy kinders, wat in Hom glo
om by Hom te wees.

Ja, ons wag op die Here,
en ons sing tot sy ere.
Ja, Hy kom weer verseker
om ons te kom haal.

2. By die Vader, by die Vader,
maak Hy vir ons woonplek;
sodat almal wat in Hom glo
ook by Hom kan wees.

Ja, ons wag op die Here,
en ons sing tot sy ere.
Ja, Hy kom weer verseker
om ons te kom haal.

3. Hy's die Weg en Hy's die Waarheid,
die Lewe vir elkeen;
sodat almal wat in Hom glo
vir ewig sal leef!

Ja, ons wag op die Here,
en ons sing tot sy ere.
Ja, Hy kom weer verseker
om ons te kom haal.

Geskiedenis

Teks 
“When He cometh” van William Cushing is gepubliseer in George F Root en BRHanby (1833-1867) se The Red Bird, the Summer Number of ‘Our Song Birds’, a Juvenile Musical Quarterly (1866). Daarin is dit genoem JEWELS na aanleiding van die eerste reël: “When He cometh, when He cometh / To make up his jewels …” Dit verwys na Maleagi 3:17 en is gedruk in baie Sondagskoolboeke waarvan die eerstes was William Batchelder Bradbury (1816-1868) se Fresh Laurels for the Sabbath School (1867) en Ira D Sankey (1840-1908) se Sacred Songs and Solos in die afdeling “Hymns for Young People”. Dit word welbekend as kinderlied in Amerika en Engeland en word steeds aangetref in die Song Book of the Salvation Army (1986 uitgawe). 

Die teks is in Nederlands vertaal vir Die Halleluja (1903) en die aanvangsreël lui: “As Hij weerkomt”. Dit is opgevolg met ’n Afrikaanse vertaling in Die Nuwe Halleluja (1931). Jacques Louw (#304) se teks in die Liedboek (2001) is gebaseer op Johannes 14:1-6. 

William Orcutt Cushing (*31 Desember 1823, Hingham Center, Maryland; †19 Oktober 1902, Lisbon, New York) se ouers was Unitaries. Hy word ’n predikant van die Christian Church, Disciples of Christ, en bedien sy eerste pastoraat in Searsburg, New York. Na 1854 gaan hy voort om gemeentes in Auburn, Brooklyn (Buffalo) en Sparta, New York State, te bedien. Na die dood van sy vrou in 1870 gaan sy gesondheid agteruit en hy verloor sy stem. Gevolglik tree hy af as predikant en begin om kerkliedere te skryf. Hiervan is oor die 300 bekend. Van hulle is opgeneem in Ira D Sankey se Sacred Songs and Solos. Die liedere waarvoor hy veral onthou word, is “Down in the valley with my Saviour I would go”, “O safe to the rock that is higher than I”, “Ring the bells of Heaven, there is joy today”, “Under his wings I am safely abiding” en “When He cometh, when He cometh”. 

Melodie 
Die melodie van hierdie lied is geskryf deur George Root in 1866 en staan bekend as JEWELS of WHEN HE COMETH. 

George Frederick Root (*30 Augustus 1820, Sheffield, Massachusetts; †6 Augustus 1895, Bailey Island, Maine) se familie verhuis na North Reading, Massachusetts, toe hy ses jaar oud was. In 1838 begin hy werk vir die musiekonderwyser Artemas Nixon Johnson (1817-1892) in Boston en deur hom kry hy verskeie musiekgeleenthede in die stad. Root neem fluit- en orrellesse en ontvang sangonderrig van George James Webb (1803-1887). Hy kom onder die invloed van Lowel Mason (#201) saam met wie hy die Boston Academy of Music in 1833 begin. Teen 1840 begin hy om saam met Mason musiek te onderrig aan die Academy en in openbare skole in Boston. Van sy liedere word nou gepubliseer – die vroegste daarvan is “See the Sky Is Darking” (Boston, 1845). In April 1853 open Root, Mason en William Bradbury die New York Normal Musical Institute in New York City. In 1856 word die Normal Musical Institute verskuif na Root se tuisdorp, North Reading, en vanaf 1861 tot met die sluiting daarvan in 1885, het die Institute bestaan in verskeie stede. Vanaf 1849 tot 1882 het Root talle liedversamelings die lig laat sien. Enkele voorbeelde is: A Collection of Church Music (John Wiley, New York, 1849); The Academy Vocalist (Mason Bros., New York, 1852); The Shawm (New York, 1853); The Young Men’s Singing Book (New York, 1855); The Musical Album (New York, 1855); The Sabbath Bell (New York, 1857); The Diapason: A Collection of Church Music (New York, 1860); The Bugle Call (Chicago, 1863); The Triumph (Chicago, 1863); The Coronet (Chicago, 1865); The Forest Choir (Chicago, 1867); The Prize (Chicago, 1870); The Glory (Cincinnati, 1872); The Palace of Song (Cincinnati, 1879); The Chorus Castle (Cincinnati, 1880); en The Realm of Song (Cincinnati, 1882). Root se publikasie The Choir and Congregation (John Church, Cincinnati, 1875) staan los van sy ander publikasies. Sy versamelings sluit meer as honderd van sy eie melodieë en tekste in. Onder die melodieë tel ELLON, INVITATION, JEWELS, QUAM DILECTA, RING THE BELLS, SHEFFIELD en VARINA. Onder sy mees bekende liedtekste is “Along the river of time we glide”, “Come to the Savior, make no delay” (INVITATION), “She only touched the hem of his garment”, “O, we are volunteers in the army of the Lord”, “Sweet ’tis to sing of thee”, en “Why do you wait, dear brother” (SHEFFIELD). Sy lied “The Hazel Dell” (1852) word een van die mees populêre van sy liedere in Amerika. Bekende liedere van hom wat dateer uit die Civil War-jare sluit in “The Battle Cry of Freedom”, en “Tramp, Tramp, Tramp, the Boys Are Marching”. ’n Eredoktorsgraad in musiek word aan hom toegeken deur die Baptiste-geaffilieerde (Old) University of Chicago. Vanaf 1872 tot 1876 was hy president van die Chicago Musical College. 

Root, in samewerking met Charles Clinton Case (1843-1918), het ook die volgende boeke wat van sy melodieë bevat het, gepubliseer: The Arena of Song (1881), Pure Delight (1883), Our Song World (1884), Wondrous Love (1885) en A Paragon of Song (1894). 

Bronne 
CDH; CWC: 331; Hymnary.org