Lied 577

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Die Heer, my herder, sorg vir my,
Hy laat my rustig wei;
langs waters waar daar vrede is,
sal Hy my veilig lei.

2. Die Heer gee my weer nuwe krag
en Hy sal met my gaan;
Hy lei my op die regte pad
ter ere van sy Naam.

3. Al lÍ daar donker dieptes voor,
tog hoef ek nie te vrees,
want U's by my, en in u hand
sal ek steeds veilig wees.

4. U maak vir my 'n fees gereed
terwyl my vyand kyk.
U maak van my 'n eregas;
U maak my lewe ryk.

5. Net goedheid, liefde, lewenslank,
gee U, o Heer, vir my;
by U's ek tuis, en in u huis
sal ek vir ewig bly.

Geskiedenis

Teks 
“The Lord’s my shepherd, I’ll not want” is vir die eerste keer gepubliseer in die Scottish Psalter van 1650 en die outeur daarvan is onbekend. Hierdie metriese weergawe van Psalm 23 is gevestig as ’n universele gunsteling en word deesdae verbind met die 19de-eeuse melodie CRIMOND. Die geskiedenis van die teks gaan ver terug. In 1556 het ’n weergawe van Psalm 23 verskyn in William Whittingham (c 1524-1579) se One and Fiftie Psalmes of David. Whittingham is in Genève getroud met Calvyn se suster en het Knox opgevolg as pastor van die Engelse gemeente daar. Hy het in 1563 hulpprediker van Durham geword en is in 1579 daar oorlede. In 1643 produseer Francis Rous (1579-1659) ’n nuwe teks wat gebaseer is op dié van Whittingham. In 1646 het die geestelikes van die Westminster Assembly Whittingham en Rous se weergawes gebruik om weereens ’n nuwe teks daar te stel. In 1650 is ’n geredigeerde vorm van die psalm ingesluit in die Scottish Psalter en dit is die weergawe wat vandag nog gebruik word. 

Die lied word graag by huwelike en begrafnisse gesing. So was dit gekies om gesing te word by die troue van koningin Elizabeth (toe prinses) en prins Philip, hertog van Edinburgh in 1947. Dit is ook gesing in die St Paulus-katedraal tydens die silwerbruilofvieringe van koning George VI en koningin Elizabeth in 1948. Elsabé Kloppers (#154) het die weergawe in Afrikaans vir die Liedboek (2001) gemaak. 

Melodie 
Die komponis van CRIMOND was vir lank ’n onderwerp van dispuut en dis steeds onseker of dit geskryf is deur Miss Jessie S Irvine. Haar vader was vir 35 jaar lank die predikant van die kerk by Crimond in Aberdeenshire en dit is waarskynlik hoe die melodie vernoem is. Dit het vir die eerste verskyn in die Northern Psalter and Hymn Tune Book (Aberdeen, 1872) waarin die redakteur, William Carnie, dit toegedig het aan David Grant en in die meerderheid van uitgawes tot 1900 word Grant se naam aangedui as die komponis. In 1911 het Miss Ann Irvine daarop aanspraak gemaak dat haar suster, Jessie, die melodie geskryf het en dat William Carnie slegs vir David Grant gevra het om dit te harmoniseer. Die woorde van die psalm is waarskynlik vir die eerste keer verbind met die CRIMOND-melodie deur sir Hugh Boberton en die Glasgow Orpheus Choir wat dit op 4 April 1836 so uitgevoer het in die Queen’s Hall, Londen. Resente navorsing bewys weer die teendeel, naamlik dat Grant wel die komponis was. 

Jessie Seymore Irvine (*26 Julie 1836, Dunottar, Kincardineshire; †2 September 1887, Aberdeen) was die dogter van Alexander Irvine, predikant van Crimond, Aberdeenshire. Hulle het onder meer ook gewoon in Dunnotan en Peterhead. 

David Grant (*1833, Aberdeen, Skotland; †1893, Lewisham, Londen, Engeland) was ’n tabakhandelaar van beroep en ’n amateurmusikant. Hy komponeer musiek vir orkeste (bands) en verwerk verskeie melodieë vir The Northern Psalter (1872). Hy dien ook as voorganger by die Footdee Church in Aberdeen. Sy melodie RALEIGH word ook nog in liedboeke aangetref. 

Bronne 
CDH; Cillié: 107-208; Colquhoun: 187; CUMH: 775; CWC: 257; HCH: 272; Knight: 257258; PHH: 149-150.