Lied 546

Sections

Lirieke

1. 'n Man was van Jerusalem na
Jerigo op pad.
Die rowers het hom aangeval
en al sy goed gevat.

2. 'n Priester het daarlangs gekom,
maar net verbygegaan.
Ook die Leviet het hom sien lê
en in sy pyn laat staan.

3. Maar toe het daar 'n vreemdeling
uit jammerte gestop.
Sy wonde is toe skoon gewas en
kry ook olie op.

4. Hy neem hom na die herberg toe
en haal twee munte uit.
Wanneer hy later weer daar kom,
betaal hy elke duit.

5. Nou wie van hierdie drie, dink jy,
het naastediens verstaan?
Die priester en Leviet het nie,
net die Samaritaan.

6. Het jy die storie mooi verstaan?
Wil jy vir Jesus dien?
Dan moet jy elke mens om jou ook
as jou naaste sien.

Geskiedenis

Teks 
Britt Hallqvist se lied verskyn in Duits as “Ein Mann ging von Jerusalem” in die bundel Lob und singt (1987). Die Afrikaanse weergawe is geskryf deur Emma Badenhorst (#175) en verskyn in die Jeugsangbundel 2 (1993). Hierdie teks is met enkele wysigings opgeneem in die Liedboek (2001). Dit is gebaseer op Lukas 10:30-37. 

Britt Gerda Hallqvist (née Nyman) (*14 Februarie 1914, Umeå, Västerbottens Län; †20 Maart 1997, Lund, Skåne Län) was ’n Sweedse kerkliedskrywer, digter en vertaler. Sy word groot in Umeå en Visby. Sy gradueer in 1938 en haar debuutpublikasie Rappens på Blåsopp verskyn in 1950. In 1983 word ’n eredoktorsgraad in teologie aan haar toegeken deur die Universiteit van Lund. Sy skryf rympies, feëverhale en stories vir kinders en word bekend as een van die voorste skrywers van kinderboeke in Swede. Hiernaas was sy ook ’n voortreflike vertaler en haar werk in hierdie veld sluit onder ander in die Sweedse vertalings van Faust en Hamlet. Engelse en Duitse religieuse poësie wat deur haar in Sweeds vertaal is, verskyn in Min dikt gäller en konung (1959). Sy dra etlike liedere by tot Den Svenska Psalmboken (1986). 

Melodie 
Bo Ramviken het die melodie in 1978 geskryf. 

Bo Edmund Ramviken (*20 Mei 1924, Sundsvall; †20 Februarie 2013, Varnhem) was ’n Sweedse kerkmusikus. Hy was musiekdirekteur en kerkmusikus in Skövde van 1954 tot 1987. Ramviken het ’n groot verskeidenheid komposisies gelewer en is bekend vir sy toonsetting van “A lot of people around Jesus were” wat in Den Svenska Psalmboken (1986) opgeneem is. Hy ontvang in 1980 ’n goue medalje van die Kungliga Musikaliska Akademiens vir sy bydrae tot Sweedse musiek. 

Bron 
Den Svenska Psalmboken; Hymnary.org; nordicwomensliterature.net