Lied 508

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Vaste Rots op wie ek bou,
Een op wie ek kan vertrou.
Rots by wie ek altyd skuil -
U is skenker van my heil.
As die golwe oor my slaan,
bly my Rots vir ewig staan.

2. Sonde woed met alle mag,
onrus kwel my dag en nag.
In my sonde vasgevang,
laat U my na U verlang.
U het alles vir my veil -
God, my Rots van ware heil!

Geskiedenis

Teks 
“Rock of ages, cleft for me” is geskryf deur Augustus Toplady (#239) in 1763 en vir die eerste keer volledig gepubliseer in The Gospel Magazine (Londen, 1776). Vir meer inligting oor die teks, sien Lied 239. 

Die Nederlandse vertaling “Vaste rots van mijn behoud” is gedoen deur Jacqueline van der Waals. ’n Afrikaanse vertaling deur CJA Vos (#167) is gepubliseer in die Sing onder mekaar (1989): “Vaste rots op wie ek bou”. Dit is met geringe wysigings opgeneem in die Liedboek (2001). 

Jacqueline Elizabeth van der Waals (*2 Junie 1868, ’s Gravenhage; †20 April 1922, Amsterdam) was onderwyseres in Doorn (1901-1904), Bloemendaal en later ook aan die School voor Maatschappelijk Werk in Amsterdam. Haar roman, Noortje Velt verskyn in 1907, maar sy was veral bekend as digter. Haar bundels sluit in Verzen (1900), Nieuwe Versen (1909), Iris (1918) en postuum Laatste verzen (1923). Naas enkele oorspronklike tekste het sy ook kerkliedere vertaal. Een hiervan is “Vaste Rots van mijn behoud”. Een van haar eie tekste wat ook bekend geword het, is “Wat de toekoms brengen moge”. 

Melodie 
Die melodie SPAIN (ook bekend as SPANISH CHANT, SPANISH HYMN of MADRID) was waarskynlik ’n 17de-eeuse Spaanse (volks-)melodie wat vir die klavier (pianoforte) verwerk is deur Benjamin Carr. Dit is gepubliseer met die volgende titel: Spanish Hymn, Arranged and Composed for the Concerts of the Musical Fund Society of Philadelphia, by Benjamin Carr (Philadelphia, 1826). Montagu Burgoyen publiseer die melodie ook in A Collection of Metrical Versions (Londen, 1827). 

Benjamin Carr (*12 September 1768, Londen; †24 Mei 1831, Philadelphia, Pennsylvania) was ’n sanger, musiekonderwyser, komponis en musiekuitgewer. Hy stam uit ’n familie van musikante. Na musiekstudies by Samuel Arnold (1740-1802) en Charles Wesley II, emigreer hy na Amerika in 1794, waar hy musiekuitgewerye in Philadelphia en New York City begin. In dieselfde jaar word sy gewilde Federal Overture gepubliseer. Hy begin ook die Carr’s Musical Repository, waarvan gemeen word dat dit die eerste musiekwinkel in Philadelphia was. Carr dien as orrelis en koormeester by St Peter’s Episcopal Church in Philadelphia en vanaf 1801 tot 1831 was hy musiekdirekteur van St Joseph’s Catholic Church in Philadelphia. In 1820 was hy een van die stigterslede van die Musical Fund Society van Philadelphia. Hy was ’n bekende klavier- en sangonderwyser. Sy klavierwerke sluit in korter sonates, rondo’s en variasievorms. 

Van sy liedere is Six Ballads from The Lady of the Lake Opus 7 in 1810 gepubliseer – dieselfde jaar as die gedig deur sir Walter Scott. Die Hymn to the Virgin hieruit word gereken as een van die beste vroeg-Amerikaanse liedere. Hy publiseer ook bundels met kerkmusiek. Die bekendste hiervan is Masses, Vespers, Litanies, Hymns, Psalms, Anthems & Motets for the use of Catholic Churches (1805) en die Collection of Chants and Tunes for the Use of the Episcopal Church in the City of Philadelphia (1816). Van hom verskyn ook verskeie belangrike pedagogiese werke, onder meer Lessons and Exercises in Vocal Music (c 1811) en The Analytical Instructor for the Piano Forte (1826). Sy musiek was populêr in plaaslike kringe en ongeveer 12 kerkliedmelodieë is gepubliseer tussen 1803 en 1820. Carr se melodieë ST AUGUSTINE’S en WHITSUNDAY HYMN was oënskynlik die gewildste, maar het vergete geraak in die moderne liedboeke. 

Bronne 
CDH; CGLB: 1268-1269; PHC: 122; www.hymntime.com; www.pdhymns.com