Lied 472

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Kom lofsing die Heer;
loof Hom op sy troon;
laat glansryk die hemel hulde betoon.
Loof Hom, helder sterre,
loof Hom, son en maan,
prys Hom, alle wesens -
Hy laat jul bestaan.

2. Kom lofsing die Heer;
loof almal en juig;
laat weerlig Hom eer en berge kom buig.
Loof Hom, oseane,
loof Hom, berg en meer,
prys Hom, ganse aarde,
prys Hom wat regeer.

3. Kom lofsing die Heer;
loof almal sy Naam;
gee Hom al die eer,
kom juig almal saam.
Oor aarde en hemel is Hy in beheer.
Roem, almal wat lewe,
kom lofsing die Heer.

Geskiedenis

Teks 
Hierdie oorspronklike teks van Elsabé Kloppers (#154) verskyn vir die eerste keer in die Liedboek (2001). Dit is gebaseer op Psalm 148. 

Melodie 
Die melodie HANOVER (ook bekend as BROMSWICK TUNE, ALIFF (AYLIFFE) STREET, ST MICHAEL’S TONE en OLD 104TH) het vir die eerste keer anoniem verskyn in A supplement to the new Version of the Psalms by Dr Brady and Mr Tate (Londen, 1708). Daar was dit die melodie vir ’n toonsetting van Psalm 67 en is een van 30 nuwe melodieë wat in die bundel opgeneem is. Daarin word dit genoem “a new tune of 149th Psalm of the New Version and 104th of the Old”. 

Daar is groot kontroversie oor of GF Handel (#417) of William Croft (#277) die komponis van die melodie was. Die naam HANOVER is in hierdie tyd aan die melodie gegee en daar is gemeen dat Handel die komponis was, aangesien hy in 1710 die hofdirigent in Hanover was voordat hy na Engeland gegaan het. Sommige geleerdes reken weer dat dit deur John Playford (1674-1730) geskryf is en ander skryf dit toe aan William Croft (1678-1727). Dit word egter nou sonder enige twyfel aanvaar dat dr Croft die komponis was. Die hoofrede waarom Croft as komponis aanvaar word, kom uit Tyrtle en Taylor se The People’s Music Book (1844) waar die melodie genoem word THE OLD 104TH. In die teks word dit aan Handel toegeskryf, maar Croft word in die inhoudsopgawe vermeld as die komponis. Daar is ’n nota bygevoeg wat lees: “… has been ascertained to be the composition of Dr Croft, by satisfactory evidence, since the page in which it was contained was printed”. 

Die naam HANOVER word verbind met die melodie in die tweede uitgawe van Nathaniel Gawthorne (1675-1730) se Harmonia Perfecta: A Compleat Collection of Psalm Tunes (Londen, 1730) en was waarskynlik ’n uitdrukking van lojaliteit aan koning George van Hanover wat toe regeer het. In Parochial Psalmody (1762) van William Riley het dit dieselfde vorm as vandag. 

Bronne 
CWH: 271; HC: 728-729; HCLBW: 376-377, 553-554; Knight: 35; PHH: 286, 645.