Lied 445

Groot Gloria E4; Nikolaus Decius 1522; J Baumbach 1934; gewysig Izak de Villiers 1978 / 2001

Allein Gott in der Höh’ sei Ehr – Middeleeus; Nikolaus Decius 1539

Inligting oor die verwerking van hierdie lied is nie tans beskikbaar nie.

Inligting oor die uitgewer van hierdie lied is nie tans beskikbaar nie.

Teks 
“Allein Gott in der Höh’ sei Ehr” is ’n liedbewerking van die Groot Gloria deur Nicolas Decius (#392). Decius het reeds teen 1522 Protestantse liedere gehad vir enkele gesonge dele van die Katolieke Mis:“Gloria”, “Sanctus” en “Agnus Dei”. Dit is een van die klassieke toonsettings van die Gloria in excelsis Deo in die koraaltradisie. Baie mense hou dit voor as van die oudste liedere van die Duitse Evangeliese kerk. Die gebruik van die Gloria in excelsis Deo (na aanleiding van Lukas 2:14) kom al heel vroeg voor; eers as deel van die Kersfeesmis, later ook in die Misse vir Paastyd en ten slotte as vaste deel van die liturgie. Daar verskyn ’n weergawe van die lied in Platduits in Joachim Slüter se Eyn gantz schone unde seer nutte ghesankBoek (Rostock, 1525). Die lied is ook gepubliseer in Hoogduits in Valentin Schumann se Geistliche Lieder (Leipzig, 1539). 

Eerwaarde J Baumbach (#192) het die lied van Decius in Afrikaans vertaal en dit is gepubliseer in sy bundel, Cantate, wat bedoel was vir gebruik deur die Berlynse Sendinggenootskap (1934). Izak de Villiers (#153) het die Gloria weer vertaal vir die 1978-bundel deur gebruik te maak van Decius en Baumbach se tekste. In die Liedboek (2001) is die vierde strofe van die 1978-weergawe gewysig. 

Melodie 
Die melodie ALLEIN GOTT IN DER HÖH’ SEI EHR is ook gekomponeer deur Nicolas Decius (#392). Dit is saamgestel uit ’n ou Paas-Gloria (Middeleeus) en wel uit die antwoord van die koor/gemeente op die intonasie van die priester. Die teks lui: ”Et in terra pax.”Vir meer inligting oor die melodie, sien Lied 404. 

Bronne 
Cillié: 50-51; CGLK: 605-607; HC: 230; HLH: 29, 177.