Lied 442

Vers 1

1. Gees van God wat in my woon,
breek die Woord vir my.
Gees van God wat in my woon,
kom en heilig my.
Troos my, sterk my, leer my, lei my.
Gees van God, kom heilig my –
breek die Woord vir my.

Kry toegang tot die volledige lirieke. Gemeentes met ’n aktiewe kerkmusiek-lisensie wat reeds op Missio.org.za geregistreer is, kan aanteken om alle verse se lirieke te sien.

Kry toegang tot alle bladmusiek en ander aflaaibare lêers. Gemeentes met ’n aktiewe kerkmusiek-lisensie wat reeds op Missio.org.za geregistreer is, kan aanteken om af te laai.

Spirit of the living God – Daniel Iverson 1926; Afrikaanse weergawe Jacques Louw 2001
IVERSON – Daniel Iverson 1926 © Birdwing Music, USA. Met toestemming gebruik (teks in hierdie vertaling en melodie).
Inligting oor die verwerking van hierdie lied is nie tans beskikbaar nie.
Inligting oor die uitgewer van hierdie lied is nie tans beskikbaar nie.

Teks 
Daniel Iverson het die eerste strofe van die lied “Spirit of the living God” geskryf nadat hy ’n preek oor die Heilige Gees gehoor het tydens ’n evangelisasieveldtog deur George T Stephans se Evangelistic Team in Orlando, Florida, in 1926. Die lied is toe gedurende die veldtog gesing en as ’n blaadjie gedruk vir gebruik in ander dienste. Dit is anoniem gepubliseer in Robert H Coleman (1869-1946) se Revival Songs (1929) met geringe wysigings aan die melodie. Hierdie kort lied was reeds baie gewild teen die middel van die 20ste eeu. Sedert die 1960’s is die lied weer regmatig toegeskryf aan Iverson. Die Afrikaanse weergawe van Jacques Louw (#284) is gepubliseer in die Liedboek (2001). 

Daniel Iverson (26 September 1890, Brunswick, Georgia; †3 Januarie 1977, Asheville, North Carolina) studeer aan die Universiteit van Georgia, die Moody Bible Institute, die Columbia Theological Seminary en die Universiteit van Suid-Carolina. Hy is geordineer in die Presbiteriaanse Kerk in 1914 en bedien gemeentes in Georgia en in Noord- en Suid-Carolina. In 1927 stig hy die Shenandoah Presbyterian Church in Miami, Florida, en dien daar tot met sy aftrede in 1951. As evangelis en as prediker vestig hy sewe nuwe gemeentes gedurende sy bediening in Miami. 

Melodie 
IVERSON is geskryf in 1926 deur Daniel Iverson. Dit is ’n eenvoudige koortjie en soos hier bo vermeld, is geringe wysigings aan die melodie aangebring in Robert H Coleman se Revival Songs (1929). Dit is vernoem na die komponis. 

Bronne 
CDH; PHH: 583-584.