Lied 441

Sections

Lirieke

1. O Heil'ge Gees, ons Heer,
wat ons in waarheid leer,
vernuwe ons gemoed
deur u genade.
Gee vreugde op die fees.
Laat ons getuies wees,
Ons wil vertel
van al u wonderdade.

2. Ons bid U, Heil'ge Gees,
laat ons gehoorsaam wees.
Gees van die Vader,
van ons Heer en Koning,
ons loof u heerlikheid
in hierdie Pinkstertyd.
O Skepper-Gees,
maak in ons hart u woning.

Geskiedenis

Teks 
Die oorspronklike Italiaanse teks, “Discendi, amor santo”, is geskryf deur die 15deeeuse monnik, Bianco da Siena. Die teks is gepubliseer in die 19de eeu in Laudi Spirituali del Bianco da Siena, Povero Gesuato del Secolo XIV (Lucca, 1851), waarvan Telesforo Bini die redakteur was. Hiervoor het hy ’n manuskripbron gebruik. Die teks is in Engels vertaal deur RF Littledale as “Come down, o Love Divine” en gepubliseer in sy versameling The People’s Hymnal (1867). Izak de Villiers (#153) het sy Afrikaanse teks vir die 1978-bundel gebaseer op Littledale se vertaling. Die teks is effens gewysig in die Liedboek (2001). 

Bianco da Siena (Bianco di Santi) (*c 1350, Anciolina; †Venesië, 1399) is gebore in Anciolina, ’n klein Toskaanse dorpie naby Arezzo, in dieVald’ Arno. In 1367 sluit hy aan by die Orde van die Jesuïete wat deur Giovanni Colombinus (c 1300-1367), ’n edelman van Siena, gestig is. Hulle was ’n groep leke wat die leerstellings van St Augustinus nagevolg het. Hy woon ’n ruk lank in Venesië waar hy later sterf. Baie min is verder oor sy lewe bekend. Sy himnes was in manuskripvorm totdat dit deur Telesforo Bini (1805-1861) onder die titel Laudi Spirituali del Bianco da Siena, Povero Gesuato del Secolo XIV (Lucca, 1851) gepubliseer is. Hierdie boek bevat 92 Laudes. 

Richard Frederick Littledale (*14 September 1833, Dublin; †11 Januarie 1890, Londen) het studeer aan die Trinity College, Dublin, waar hy goed presteer het. Hy het ’n BA (1855), MA (1858) en LLD (1862) verwerf. Hy is geordineer en word kurator van St Matthew’s, Thorpe Hamlet, Norwich (1856-1857) en later kurator van St Mary the Virgin, Crown Street, Soho, Londen (1857-1861). In 1861 het hy afgetree as priester weens swak gesondheid en wy toe sy tyd aan skryfwerk. Hy voltooi onder andere sy vriend, JM Neale (#320), se Commentary on the Psalms from Primitive and Mediaeval Writers (volumes twee tot vier, 1868-1874), en skryf oor verskeie godsdienstige onderwerpe. Littledale was ’n vurige kampvegter vir die Anglikaanse kerk en was duidelik daarteen gekant dat Anglo-Katolieke na die Katolieke Kerk oorgegaan het. Publikasies wat hieruit voortvloei, is onder meer Ritualists not Romanists (1876), Why Ritualists do not become Roman Catholics (1878), en Plain Reasons for not joining the Church of Rome (1880). 

Littledale was ’n kenner van ou en moderne tale en ’n ywerige vertaler van himnetekste. Hy publiseer Carols for Christmas and Other Seasons (1863), en The People’s Hymnal (1867). In laasgenoemde bundel verskyn onder meer vertalings van vier himnes van Bianco da Siena. Die bekendste hiervan is sy weergawe van die himne “Discendi, amor santo” as “Come down, o Love Divine”. 

Melodie 
Littledale se vertalings het verskyn in sy versameling The People’s Hymnal (1867), maar het in vergetelheid geraak totdat een van die samestellers van The English Hymnal dit onder die aandag van die redakteur, Ralph Vaughan Williams, gebring het. Die melodie bekend as DOWN AMPNEY is gekomponeer deur Ralph Vaughan Williams (#269) vir die teks van Littledale. Dit is vernoem na Vaughan Williams se geboorteplek naby Cirencester in Gloustershire. Die melodie verskyn met Littledale se teks in The English Hymnal (1906). 

Bronne 
CDH; Cillié: 347; HCHAM: 695; Hymnary.org; PHH: 201-202, 583-584.