Lied 421

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Die Here Jesus lewe,
Hy het die dood oorwin.
Met krag is Hy oorwinnaar:
Ons toekoms het begin.
Hy gee ons hoop en vrede,
ons kan weer voorwaarts gaan,
want Jesus is ons Here,
Hy't klaar ons weg gebaan.

2. Die Here Jesus lewe,
Hy't hemel toe gevaar.
Hy heers daar as die Koning:
Ons word deur Hom bewaar.
Laat ons met moed en ywer
ons roeping hier volbring,
want Jesus is óns Koning,
Hy gee ons lewe sin.

3. Die Here Jesus lewe,
Hy kom ons eendag haal.
Hy sal ons dan laat aansit
by sy Messiasmaal.
Kom, laat ons Hom verheerlik,
sy liefde nou besing,
en, saam met als wat lewe,
aan Hom ons hulde bring

Geskiedenis

Teks 
Johan Cilliers (#161) het hierdie teks nuut geskryf vir die Liedboek (2001). 

Melodie 
Die melodie MORNING LIGHT (ook bekend as WEBB en STAND UP) wat vir hierdie lied gebruik word, is geskryf deur George Webb en vir die eerste keer gepubliseer in The Odeon, a collection of secular melodies (Boston, 1837), ’n versameling van sekulêre musiek wat saamgestel is deur Webb en Lowell Mason (#201). Webb het dit geskryf vir ’n sekulêre gedig, “Tis dawn, the lark is singing”, wat bedoel was vir ’n vertoning aan boord van ’n skip tydens ’n seereis oor die Atlantiese oseaan in 1830. Dit is later aangepas vir Samuel F Smith (1808-1895) se teks “The morning light is breaking” – vandaar die naam MORNING LIGHT – en gepubliseer in Moses Lewis Scudder (1843-1917) se The Wesleyan Psalmist (Boston, 1842). Die melodie word ook geassosieer met George Duffield (1818-1888) se teks: “Stand up, stand up for Jesus”. Hierdie verbintenis kom voor in WB Bradbury (1816-1868) se The Golden Chain (New York, 1861). Duffield se lied word weer in Engeland gepubliseer in die Wesleyaanse Methodist Sunday School Tune Book (1881), en die Supplement (1889) tot die Second Edition (1875) van Hymns Ancient and Modern. ’n Afrikaanse weergawe van dié teks verskyn in Die Halleluja (1951). 

George James Webb (*24 Junie 1803, Salisbury; †7 Oktober 1887, Orange, New Jersey) se ouers het gewens dat hy tot die bediening sal toetree, maar hy het musiek as loopbaan gekies. 
Hy studeer orrel aan die Salisbury Cathedral en word orrelis van ’n kerk in Falmouth. In 1830 emigreer hy na die VSA en vestig hom in Boston. Daar word hy gou bekend as ’n vooraanstaande musiekonderwyser en was ook vir 40 jaar orrelis van die Old South Church in Boston. In sy latere jare onderrig hy sang in Orange (New Jersey) en New York City en publiseer twee boeke oor sangpedagogiek. Hy onderrig ook aan Lowell Mason (#201) se Boston Academy of Music en was president van die Handel and Haydn Society. In 1835 sluit Webb aan by die Swedenborgian Church en speel ’n invloedryke rol in die vorming van dié kerk se Musical Service Book (1836) en hersienings daarvan (1854 en 1876). He was ook die redakteur van ander liedboeke soos The Massachusetts Collection of Psalmody (1840), The Psaltery (1845), The Melodist (1850) en Cantica Ecclesiastica (1859). In samewerking met Mason sien The National Psalmist (1848) ook die lig.

Bronne 
CDH; Colquhoun: 210-211; CWH: 490-491; Knight: 248-249; PHH: 733-734.