Lied 402

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Die Heer het waarlik opgestaan.
Halleluja. Halleluja -
Die dood se mag is nou verslaan.
Halleluja! Halleluja!

2. Hy het nie in die graf gebly.
Halleluja. Halleluja -
Hy is die hoop wat ons bely.
Halleluja! Halleluja!

3. Hy het die graf en dood oorwin.
Halleluja. Halleluja -
Sy lewe gee ons nuwe sin.
Halleluja! Halleluja!

4. Nou kan ons almal vrolik wees.
Halleluja. Halleluja -
Ons sing nou bly, vier Christusfees.
Halleluja! Halleluja!

Geskiedenis

Teks 
Die teks “Surrexit Christus hodie” kan teruggevoer word na ’n geestelike volkslied van die 14de of 15de eeu wat in die tyd van Luther baie gewild was. Daar bestaan drie manuskripte waarin die teks voorkom, naamlik die Praag-manuskrip (14de eeu), München-manuskrip (14de eeu) en die Engelberg-manuskrip (1372). ’n Manuskrip uit Breslau van 1478 bevat ’n samevoeging van die Duitse en Latynse tekste. Die teks is in Nederlands vertaal deur Hans Rapparlié in 1968 vir die nuwe Gezangboek van de Evangelische Broedergemeente in Nederland. Louwrens Strydom (#174) se Afrikaanse weergawe verskyn vir die eerste keer in die Liedboek (2001). 

Hans Hugo Rapparlié (*10 Junie 1909, Elim; †15 Junie 1987, Zeist) is gebore op die sendingstasie van die Evangeliese Broedergemeente in Elim in die Kaapkolonie. Die familie bring vakansies deur in Europa by Zeist en Herrnhut. Hy gaan skool in Stellenbosch en vanaf 1925 aan die Handelskool in Utrecht (Nederland). Die familie het toe na Zeist verhuis. Rapparlié ontvang orrellesse van Jan Abel Wolf (1870-1954), die orrelis van die Broedergemeente in Zeist, en sit dit later voort onder Mees van Huis (1909-1996) in Utrecht. Hy kry ook opleiding in koordireksie van die sangeres en sangonderwyser Jeannette Molsbergen (1885-1963). Hy werk ’n paar jaar by die firma Philips, maar sedert 1929 staan hy toenemend in diens van die Broedergemeente. Hy was ’n lid van die sinode van die Europese Broeder-Unität en dien ook op die finansiële kommissie van die Nederlandse Raad vir Kerke. Vanaf 1946-1951 was hy orrelis en kantor van die Broedergemeente in Zeist en komponeer enkele motette wat in die Choralbuch der Brüdergemeinde (1960) gepubliseer is. Hy was 20 jaar lank deel van die kommissie wat die voorbereiding gedoen het vir die nuwe Gezangboek van de Evangelische Broedergemeente in Nederland (’s-Gravenhage, 1968). Hierin is hy aktief wat die versameling van himnologiese inligting, vertaling van tekste en administrasie betref. 

Melodie 
Die melodie ERSTANDEN IST DER HEILIG CHRIST dateer uit die 14de eeu. Dit is oorgelewer in manuskrip uit Hohenfurt (1410) en verskyn in twee 16de-eeuse gesangboeke wat deur die Boheemse Broeders uitgegee is, naamlik ’n Gesangbuch (Praag, 1501) en Ein New Gesengbuchlen (Jungbunzlau, 1531). Melchior Vulpius (#153) publiseer dit weer in Ein schön geistlich Gesangbuch (Birnstiel, 1609). 

Bronne 
CGLB: 519-520; EG: #105; Hymnary.org; PHC: 96; www.graftombe.nl