Lied 400

Sections

Lirieke

Juig, juig in Hom,
ons Heiland aan die kruis,
tot elke tong en taal Hom eer bewys.

1. Kom, volk van God,
kom volg Hom waar Hy lei,
want Hy is Oorwinnaar,
selfs wanneer Hy ly.

Juig, juig in Hom,
ons Heiland aan die kruis,
tot elke tong en taal Hom eer bewys.

2. Lydende Kneg,
maar Vors van vorste - Hy!
En ons as sy knegte
ken sy heerskappy.

Juig, juig in Hom,
ons Heiland aan die kruis,
tot elke tong en taal Hom eer bewys.

3. Ons dra sy teken,
Hy het ons verseël,,
gekoop met sy bloed
uit elke wêrelddeel.

Juig, juig in Hom,
ons Heiland aan die kruis,
tot elke tong en taal Hom eer bewys.

4. Laat elke volk en stam
die boodskap dra
van Hom en sy kruis -
die prys van Golgota.

Juig, juig in Hom,
ons Heiland aan die kruis,
tot elke tong en taal Hom eer bewys.

5. Kom, volk van God,
loof Christus vir sy kruis;
kom sing 'n triomflied,
laat ons Jesus prys!

Juig, juig in Hom,
ons Heiland aan die kruis,
tot elke tong en taal Hom eer bewys.

Geskiedenis

Teks 
Die oorspronklike Engelse teks, “Lift high the cross”, is ’n hersiene weergawe deur Michael Robert Newbolt van ’n vroeëre teks van George Kitchin en is gepubliseer in Hymns Ancient and Modern se 1916 Supplement. Dit was geset op die melodie CRUCIFER. Kitchin het die oorspronklike teks in 1887 geskryf vir die Society for the Propagation of the Gospel en dit was bedoel vir ’n feestelike diens by Winchester Cathedral in 1887. Die Afrikaanse teks van Louwrens Strydom (#174) is geskryf in 1989 en gepubliseer in die proefbundel Sing onder mekaar (1989). Dit is onveranderd oorgeneem in die Liedboek (2001). 

George William Kitchin (*7 Desember 1827, Ipswich; †13 Oktober, 1912, Durham) was die seun van die rektor van St Stephens in Ipswich. Hy studeer aan King’s College en aan Christ Church, Oxford, waar hy in 1846 gradueer. Kitchin was ’n geleerde en geestelike van die Anglikaanse kerk en bring die grootste deel van sy lewe deur aan akademiese instellings. In 1863 word hy “censor and tutor” by Oxford en vyf jaar later die “censor” van die “non-collegiate”-studente. Hy was ook Dekaan van Winchester- Katedraal vanaf 1883 tot 1894 en van Durham-Katedraal vanaf 1894-1912. In 1909 word hy benoem as kanselier van die Durham University. Sy publikasies sluit in A life of Pope Pius II (1881), ’n werk in drie volumes getitel A history of France (1877) en argeologiese geskrifte. 

Michael Robert Newbolt (*27 September 1874, Dymock, Gloucestershire; †7 Februarie 1956, Bierton, Buckinghamshire) ontvang BA- (1895) en MA-grade (1912) van St John’s College, Oxford. Hy word ingeseën as hulpprediker in 1899 en as priester in die volgende jaar. Hy was assistent-kurator van Wantage (1899-1905); vikaris van St Mary’s, Iffley (1905-1910); prinsipaal van die Missionary College, Dorchester (19101916); deurlopende kurator van St Michael and All Angels in Brighton (1916-1927); en domheer van Chester Cathedral (1927-1946). In 1946 ontvang hy ’n lisensiaat “to officiate” in die bisdom van Oxford. Hy skryf verskeie teologiese boeke insluitende ’n kommentaar op Openbaring. 

Melodie 
Die melodie CRUCIFER is gekomponeer deur Sydney Nicholson vir Newbolt se teks en is ingesluit in die 1916 Supplement van Hymns Ancient and Modern. Die naam van die melodie beteken “Cross-bearer” en verwys na die persoon wat die kruis dra tydens liturgiese prosessies. 

Sydney Hugo Nicholson (*9 Februarie 1875, Londen; †30 Mei 1947, Ashford, Kent) ontvang MA- en DMus-grade van die New College, Oxford. Hy studeer aan die Royal College of Music waar hy onderrig ontvang in orrel by Walter Parratt (1841-1924) en in komposisie by Charles Villiers Stanford (1852-1924). Gedurende hierdie periode is hy ook orrelis van die Barnet Parish Church. In 1903 word hy orrelis van die Lower Chapel, Eton College, en in die volgende jaar assistent-orrelis van Carlisle Cathedral. In 1908 word hy aangestel as orrelis van Manchester Cathedral en tien jaar later gaan hy na Westminster Abbey. Hy bedank in 1927 om hom voltyds aan die School of English Church Music by die St Nicholas College, Chislehurst, te wy. Hy was die stigter van die skool in 1927 en was direkteur tot met sy dood. In 1945 word hierdie skool die Royal School of Church Music en verplaas na Canterbury. Hy word in 1938 tot ridder geslaan vir sy dienste aan kerkmusiek. 

Nicholson speel ’n belangrike rol in die ontwikkeling van Hymns Ancient and Modern. Hy word musiekredakteur onder dr WH Frere in 1913 en dien vanaf 1938 tot 1947 as voorsitter van die komitee. Sy komposisies sluit in operettes, verskeie vorms van kerkmusiek, wat insluit “anthems” en kerkliedmelodieë. Van sy publikasies sluit in Church Music, a Practical Handbook (1927) en saam met George LH Gardner A Manual of English Church Music (1923). 

Bronne 
CDH; CWC: 310; HC: 511-512; HCLBW: 421-422; PHH: 529-530.