Lied 362

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Vol vreugde sing die eng'leskaar:
Ere! Ere!
Aan Hom, die God van die hemele!
Die Seun word mens, Gods Woord is waar.
Halleluja! Halleluja!
Hy't ons kom red, ons skuld gedra.

2. Ons loof die Raadsman, wonderbaar:
Ere! Ere!
Aan Hom, die Heer van die hemele!
Gods liefde is geopenbaar.
Halleluja! Halleluja!
Hy't ons kom red, ons skuld gedra.

Geskiedenis

Teks 
Die oorspronklike Duitse teks“Vom Himmel hoch, ihr Englein kommt” was aanvanklik as anoniem aangedui, maar resente navorsing toon aan dat die digter moontlik die Jesuïte-priester Friedrich Spee (1591-1635) was. Die teks word vir die eerste keer gedruk in Das allerschönste Kind in der Welt (Würzburg, 1622). Dit verskyn ook in die Ausserlesene Catholische Geistliche Kirchengesäng (Keulen, 1623). Naas die vele Halleluja-uitroepe in die teks, verskyn daar ook in die Duitse teks die woord “Susani” wat ’n samevoeging is van twee woorde, naamlik “Süsse”en “Ninne” (slaap kindjie). Die verbinding met die Duitse wiegeliedgenre is deur vele geleerdes uitgewys en daar word gevolglik soms na die lied verwys as die “Susani-wiegelied”. Dit het byvoorbeeld hierdie titel in die FAKsangbundel (1961). 

Adéle Gie het die teks vir die AGB (1944) in Afrikaans vertaal. Izak de Villiers (#153) het ’n nuwe teks geskryf vir die 1978-bundel en dit is net so oorgeneem in die Liedboek (2001). 

Adéle Gie (*17 Julie 1914, Worcester; †25 November 2012, Somerset-Wes) matrikuleer in 1931 in Worcester en kry hierna klavieronderrig van Maria Fismer van Stellenbosch. Nadat sy die onderwyslisensiaat (klavier) geslaag het, gee sy klavieronderrig op Worcester en sit haar studies in sang, harmonie en orrel voort. Gie is bekend vir haar drama Kersfees om die kampvuur (1941) en Loelie se liedjies (1947) (volkswysies). 

Melodie 
Die melodie VOM HIMMEL HOCH, IHR ENGLEIN KOMMT is van ’n onbekende komponis en verskyn in die Geistliche Kirchengesäng (Keulen, 1623) waarna hier bo verwys is. Dit kon moontlik saam met die teks ontstaan het as volkslied. Die melodie verskyn reeds in die Paderborn Gesangbuch (1616) met die volgende teks:“Puer natus in Bethlehem”. As alternatiewe teks word “Vom Himmel hoch, O Engel kommt” saam met hierdie melodie gepubliseer in die Würzburg Gesangbuch (1622). 

Bronne 
Cillié: 205; HCHAM: 703; Nienaber: 94-95; www.lieder-archiv.de; www.zeno.org