Lied 349

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Kom, kinders,
besing met 'n vrolike stem
die wonder van God in die stad Betlehem,
want daar is die Heiland
gebore, dié nag,
die hoop van die wêreld,
deur eeue verwag.

2. Geringe klein dorpie in duister gehul,
'n heilswoord is
deur dié geboorte vervul:
Die lig van die wêreld,
die God'like Kind,
is Jesus in wie ons die saligheid vind!

3. In need'rige krip
was sy bedjie berei -
die Kind wat die harte van almal verbly.
Omhoog, uit die hemel, sing engele eer,
die herders en wyses
kom kniel voor Hom neer.

4. Ons bring soos die herders
en engele weer
aan Hom alle hulde, ons Heiland en Heer.
Verlos van die sonde, besing ons tesaam
die roem en die eer
van sy heerlike Naam.

Geskiedenis

Teks 
Christoph von Schmid skryf die oorspronklike Duitse teks “Ihr Kinderlein, kommet” in 1798 in Thannhausen. Dit verskyn in Der erste Unterricht von Gott für die lieben Kleinen (1811) wat hy op eie koste laat druk het. Die lied verskyn in ’n Nederlandse vertaling in die Zondagschoolharp (Kinderharp, 1863) en in Die Halleluja van 1903. In Die Nuwe Halleluja (1931) is die teks in Afrikaans vertaal deur GBA Gerdener (#157) wat dit ook nagesien het vir die 1951-uitgawe. Die teks is gewysig deur Attie van der Colf (#164) vir die 1978-bundel en weer hersien vir die weergawe in die Liedboek (2001). Hier is dit verkort tot vier strofes. 

Christoph von Schmid (*15 Augustus 1768, Dinkelsbühl; †3 September 1854, Augsburg) was die oudste van nege kinders en kon met geldelike hulp van raadsheer Von Weber van Dilligen sy studies in teologie (Katoliek) voortsit en voltooi. Na ’n kort rukkie as sieketrooster in Allgäu, gaan werk hy in Thannhausen (an der Mindel) waar hy onder meer sy boeke Der erste Unterricht von Gott für die lieben Kleinen (1811) en Christliche Gesänge zur öffentlichen Gottesverehrung in katolischen Kirchen (1811/1839) op eie koste laat druk en in die gemeente versprei. Die doel hiermee was om die Duitse gemeentesang op te hef. Vanaf 1815 tot 1826 was Schmid predikant in Oberstadion (Stuttgart). Daar was planne om hom te beroep tot die priesterseminarium in Rottenburg, maar hy moes dit van die hand wys weens swak gesondheid. In 1826 word hy domheer in Augsburg waar hy sterf. Sy bekendste lied is “Ihr Kinderlein kommet”. Ander liedere van Schmid het verskyn in die Katolieke gebed- en gesangboek Gotteslob. 

Melodie 
Die melodie IHR KINDERLEIN KOMMET is geskryf deur Johann Schulz in 1794 en was oorspronklik bedoel vir die sekulêre teks “Wie reizend, wie wonnig ist alles umher”. So verskyn dit in die Taschenbuch und Almanach zum geselligen Vergnügen (Leipzig, 1794). Hierna kom die melodie ook voor by die kinderlied: “Wo findet die Seele, die Heimat, die Ruh”. Die melodie is eers na sy dood met die Kersteks van Von Schmid verbind deur die onderwyser en orrelis van Gütersloh, Friedrich Hermann Eickhoff (1807-1886) in sy publikasie Sechzig deutsche Lieder (Gütersloh, 1832). 

Johann Abraham Peter Schulz (*gedoop 31 Maart 1747, Lüneburg; †10 Junie 1800, Schwedt, Oder) se vader wou dat hy predikant word en stuur hom gevolglik na die Lateinschule. Sy belangstelling op skool was egter grootliks in musiek. Toe hy 18 jaar oud was, gaan hy na Berlyn waar hy in die huishouding van die Bachleerling Johann Philip Kirnberger (1721-1783) opgeneem word. Hy studeer vir drie jaar lank komposisie by Kirnberger. Hierna werk hy as huisonderwyser en pianis aan Poolse vorstehuise en onderneem ook uitgebreide reise deur Europa (1768-1772) waartydens hy verskeie musiekstyle leer ken. Met sy terugkeer na Duitsland werk Schulz as kapelmeester in die Koninklike Pruisiese Hofteater in Berlyn vanaf 1776 tot 1780. Hierna was hy agtereenvolgens die musiekdirekteur van kroonprins Henry van Pruise (1780-1787) en direkteur van die Koninklike Deense Teater in Kopenhagen (1787-1795). 

Sy besondere belangstelling in die volkslied word bevestig in publikasies soos Liedern im Volkston bey dem Klavier zu singen (1782). In die laaste jare van sy lewe verswak sy gesondheid toenemend en hy vestig hom ten laaste in Schwedt an der Oder waar hy ’n heilsgeneser besoek het. Naas IHR KINDERLEIN, KOMMET is nog twee van sy melodieë, naamlik DER MOND IST AUFGEGANGEN (Lied 561) en WIR PFLÜGEN UND WIR STREUEN (Lied 461), ook in die Liedboek (2001) opgeneem. 

Bronne 
Cillié: 179; CWH: 840; KLEG: 276, 287; LEG: 17-20; PHH: 622.