Lied 341

Sections

Lirieke

. Die regte tyd het aangebreek,
die tyd deur God bestem -
die Vader stuur vir ons sy Seun
as kind na Betlehem.

2. Vir ons gebore, as 'n mens
kom Hy in ons belang -
Hy koop ons vry, dat God ook ons
as kinders kan ontvang.

3. God maak ons kind en erfgenaam,
Hy stuur vir ons sy Gees.
Ons kan Hom nou ons Vader noem,
aan Hom gehoorsaam wees.

4. O Vader, al die lof en eer
en dank wil ons U bring;
van al u vrede, liefde, guns,
sal ons vir ewig sing!

Geskiedenis

Teks 
Die oorspronklike Engelse teks, “While shepherds watch their flocks by night”, is geskryf deur Nahum Tate (#361) en is ’n beryming van Lukas 2:8-14. Attie van der Colf (#164) het die Afrikaanse teks geskryf vir die 1978-bundel: “Eens in die volheid van die tyd”. Hierin is daar net in die vierde strofe ooreenkomste met Tate se teks. Van der Colf het ’n nuwe teks geskep vir die Liedboek (2001) wat op Galasiërs 4:4-6 gebaseer is. 

Melodie 
Die melodie WINCHESTER OLD is vir die eerste keer gepubliseer in Thomas Este se The whole Booke of Psalmes with their wanted tunes (1592) alhoewel dit daar geen titel gehad het nie. Hierin was dit geset op die metriese weergawe van Palm 84 “How pleasant is they dwelling place”. Hierdie teks en melodie word toegeskryf aan George Kirbye. Later verskyn dit ook in Thomas Ravenscroft (c 1589 tot c 1635) se Whole Book of Psalms (1621) waar dit die titel WINCHESTER dra. Die naam verwys na Winchester, ’n ou stad in Hampshire. “OLD” is bygevoeg nadat ’n ander melodie WINCHESTER NEW (sien Lied 436 en 596) verskyn het. In die Ravenscroft Psalter word die name van die komponiste van die vierstemmige settings van die melodieë vir die eerste keer genoem. Daar word gemeen dat die melodie dalk gebaseer is op Christopher Tye (c 1500-1553) se Actes of the Apostles van 1553. 

Daar is min bekend oor die vroeë geskiedenis van George Kirbye (Kirby) (*1560, Suffolk; begrawe 6 Oktober 1634, Bury St Edmunds). Hy word aangestel deur Thomas Este om te help met die verwerking van melodieë vir die Psalmes with their wanted tunes (1592). Kirbye was waarskynlik ’n geruime tyd musiekmeester aan huis van sir Robert Jermyn van Rushbrook, Bury St Edmunds. Daar word gemeen dat hy in sy later jare die koster van die St Mary’s Church in daardie dorp was. Kirbye was ook bekend vir die madrigale wat hy gekomponeer het. Die bekendste hiervan is die versameling Triumphs of Oriana (1601) wat aan Elizabeth I opgedra is. 

Thomas Este (East, Est) (*c 1540, Swavesey, Cambridge; †1608, Londen) werk vir die grootste deel van sy lewe in Londen. Hy was die toonaangewende drukker van die laat-Elizabethaanse periode. Hy druk die meeste van die vooraanstaande komponiste soos William Byrd en Thomas Morley se musiek sowel as belangwekkende publikasies soos Musica transalpina (1588), John Dowland se Second Booke of Songes or Ayres (1600) en The Triumphes of Oriana (1601). Este se belangrike bydrae tot die Engelse himnologie is sy publikasie The Whole Booke of Psalmes: with their Wonted Tunes, as they are Song in all the Churches, Composed into Foure Parts [sic] (1592). Die vierstemmige harmonisasies is deur verskillende komponiste gedoen. Uit die voorwoord blyk dit dat Este bedoel het dat die werke in plattelandse kerke gesing moes word. Dit was egter onwaarskynlik omdat parogiekore eers heelwat later ’n verskyning gemaak het. 

’n Verdere ontwikkeling was dat hy in hierdie boek name aan die melodieë toeken anders as dié wat afgelei is van die tekste soos Psalm 100, Magnificat en Veni Creator, wat verbind word met stede en dorpe. Drie hiervan is CHESHIRE, GLASSENBURIE en KENTISH. In sy hersiene uitgawe (1621) van Este se werk, sit Thomas Ravenscroft (c 1592-1635) die gebruik van geografiese name vir melodieë voort. 

Bronne 
CDH; CGLK: 589-591; CHAM: 679; Cillié: 188-189; CUMH: 290; CWH: 288; Hymnary.org; THTI: I/146-147.