Lied 328

Sections

Lirieke

1. (A) Die Heer, die Koning kom hierheen,
(B) Hy kom sy liefde, guns verleen.
(C) Ons loof u Naam, o Heer.

2. Hy kom, Hy kom, met glans en prag,
laat ons met blydskap Hom verwag.
Ons loof u Naam, o Heer.

3. Hy kom, die Heer wat vrede bring,
laat ons nou juig - met vreugde sing.
Ons loof u Naam, o Heer.

Geskiedenis

Teks 
“Er ist die rechte Freudensonn” is geskryf deur George Weissel (#326) in Königsberg in 1623 en verskyn in Erster Theil Preussiche Fest Lieder (1642). Die Afrikaanse weergawe is geskryf deur Elsabé Kloppers (#154) en gepubliseer in die Liedboek (2001). 

Melodie 
Hierdie driestemmige kanon is geskryf deur Paul Ruppel (1955/1972) na aanleiding van die melodie MACHT HOCH DIE TÜR (Halle, 1704) (sien ook Lied 326). 

Paul Ernst Ruppel (*18 Julie 1913, Esslingen am Neckar; †27 November 2006, Neukirchen-Vluyn) stam uit ’n Baptiste-gesin. Sy vader was leke-koorleier in die Baptiste-kerk in Esslingen. Die familie trek in 1924 na Kassel waar sy vader ’n pos by die uitgewery Johann Gerhard Oncken Verlag opneem. Hier kom hy, deur bemiddeling van die musiekwetenskaplike, Walter Blankenburg, in aanraking met die kerklike Singbewegung en die Kasselse Singgemeinde. Sedert 1927, met die vestiging van die uitgewer Bärenreiter, word sy styl en repertoire sterk beïnvloed deur vooraanstaande musici. So sterk was die invloed dat hy in 1933 met kerkmusiekstudies aan die Musikhochschule in Stuttgart begin waar hy onder andere met Hugo Distler (1908-1942) in aanraking kom. Na aflegging van sy finale eksamen word hy in 1936 kantor in Rheurdt en leier van die plaaslike Christliche Sängerbunde. Hy is verder betrokke by die opleiding in koorleiding van jong onderwysers. Aan die einde van 1939 word hy gedurende die Tweede Wêreldoorlog tot militêre diens opgeroep en beleef die besetting van die Nederlande. Na hy gewond is in die slag van Duinkerken word hy uit die weermag ontslaan. Hy kry nou te doen met gemeentelike sangaktiwiteite in Bodenfelde waar hy ook in ’n kaasmakery werk. In 1943 word hy weer deur die weermag opgeroep en verplaas na Stalingrad. Hy word gevange geneem en beland in Lourdes (Frankryk), Sicilië en is uiteindelik in Amerikaanse aanhouding na Noord-Afrika, Oklahoma, Arkansas en Louisiana gestuur. Na die oorlog gaan hy na Skotland en later na Sussex. In hierdie tyd dien Ruppel as orrelis in die Anglikaanse Kerk. Sy ekumeniese bewussyn word deur al hierdie ervarings versterk. Met sy terugkeer na Duitsland vestig hy hom by Schloss Leyenburg en neem dadelik die bestaande koor, waarvan die koorleier toe pas gesterf het, oor. 

Hy maak opnuut kontak met die Sängerbund. Verskeie van sy bekende kanons ontstaan in hierdie tyd (1951, 1952 en 1954). Die kanon Er ist die rechte Freudensonn (Lied 328) verskyn in 1955. Vanaf 1954-1969 is hy die redakteur van die sogenaamde Singkalender Wir loben Gott. In samewerking met Kurt Wolff verskyn, naas kanons, Singsprüche, Bybelse motette en kort kantates, ook ’n Singheft, die liedreeks Der junge Chor en Kommt und singt. Hierna volg nog talle publikasies (onder meer ’n Chorleiterbuch, 1969) en geleentheidswerke. Een so ’n werk was geskryf vir die Jeugdag in Neuss (1962) waar Ruppel ook die sang gelei het. Nadat die kasteel in Desember 1963 afgebrand het, gaan bly hy en sy gesin in Vluyn en skryf hy nog geestelike liedere. Tot 1980 is Ruppel ook orrelis in Vluyn. 

Bronne 
KLEG: 266-268; www.cs-vsg.de