Lied 327

Sections

Lirieke

1. Dag van verlossing! Kyk, Hy kom:
Gesalfde van die Heer.
Op Hom het God se Gees gekom
om goeie nuus te bring.

2. Hy bring bedruktes nuwe moed,
geboeides maak Hy vry,
verkondig God se nuwe dag:
genade ryk en vry.

3. Hulle wat treur, kom bied Hy troos;
waar smart is, gee Hy eer.
Sy volk wat sug in vreemde land
herstel Hy eind'lik weer.

4. Welig en sterk in God se heil,
geplant deur Hom, die Heer -
sy priesters, dienaars, soos hul heet,
besing sy roem en eer.

5. God se verbond staan ewig vas,
Hy doen wat Hy beloof.
Die nasies sal dit sien, sal hoor -
sy volk wat Hom bly loof.

6. Laat ons dan juig in God die Heer,
want Hy het ons genees,
gered, getooi met bruilofsprag.
Ons vier oorwinningsfees!

Geskiedenis

Teks 
Die oorspronklike teks “Hark the glad sound! The Saviour comes” is geskryf deur P Doddridge (#275) en was bedoel vir ’n diens op 28 Desember 1735. Die teks verwys na Lukas 4:18-19 en Jesaja 61. Dit is hersien en gepubliseer in die 1745 en 1781 uitgawes van die Skotse Translations and Paraphrases. Job Orton (1717-1783) publiseer dit ook in Hymns, Founded on Various Texts in the Holy Scriptures (1755). 

Die Afrikaanse teks is geskryf deur Louwrens Strydom (#174) vir die bundel Sing onder mekaar (1988) en is daarna opgeneem in die Liedboek (2001). Strydom se teks is gebaseer op Jesaja 61 en Lukas 4:16-21. 

Melodie 
Die melodie RICHMOND (ook bekend as CHESTERFIELD) is geskryf deur Thomas Haweis (#291) en gepubliseer in sy versameling Carmino Christo or Hymns to the Saviour (Bath, 1792). Samuel Webbe jr het die melodie aangepas en verkort en dit weer gepubliseer in sy Collection of Psalm Tunes (1808). Dit is herdruk in Webbe se Psalmody (1853). Die naam van die melodie word verbind met Leigh Richmond, ’n vriend van Haweis. Die benaming CHESTERFIELD kom van Lord Chesterfield, ’n staatsman wat dikwels by die Salina Hastings, hertogin van Huntingdon besoek afgelê het. Haweis was in haar diens as kapelaan. 

Samuel Webbe jr (*15 Oktober 1768, Londen; †25 November 1843, Hammersmith, Londen) ontvang musiekopleiding van sy vader, Samuel Webbe sr (1740-1816). Dit is moontlik dat hy ook by Muzio Clementi (1752-1832) studeer het. Hy volg ’n loopbaan as sanger, violis, hobo- en trompetspeler, Katolieke kerkmusikus en komponis van gewyde en sekulêre musiek. Hy voorsien musiek vir die Katolieke en Anglikaanse kerkdienste. Webbe was orrelis van die Bavarian Embassy Chapel (1791), die Spaanse Embassy Chapel en vanaf ongeveer 1798 van die Unitarian Chapel, Paradise Street, Liverpool. Later was hy ook orrelis van twee Katolieke Kerke naamlik Church of St Nicholas in Liverpool en St Patrick’s Chapel in Texteth Park. Webbe keer terug na Londen in 1810/1811. Hier was hy ’n stigterslid van die Philharmonic Society en direkteur daarvan vir die seisoene 1815-1816 en 1817-1818. Na ’n dispuut met die Society keer Webbe terug na Liverpool in die laat 1820’s en beklee poste as orrelis van St Andrew’s, Renshaw Street, St Nicholas’s en St Patrick’s Chapel, Toxteth. Hy bring sy laaste jare deur in Londen (1840-1843). 

Webbe se bydrae tot kerkmusiek behels musiek vir die mis en ander Katolieke kerkmusiek sowel as psalm- en kerkliedmelodieë. Van sy publikasies sluit in A Collection of PsalmTunes for Four Voices (Londen, 1808 en 1820), Novello’s Collection of Sacred Music Performed at the Royal Portuguese Chapel (Londen, 1822) en Webbe’s Psalmody wat postuum gepubliseer is (Londen, 1853). Hy word veral onthou vir die melodie RICHMOND wat ’n aanpassing is van ’n melodie van Thomas Haweis. 

Bronne 
CDH; Knight: 104, 269; PHH: 483-484; Westermeyer: 1-3.