Lied 301

Sections

Lirieke

1. Ons kom vier u maaltyd, Vader,
U sal ons oorvloedig voed.
U versorg ons soos 'n herder,
U sal ons steeds trou behoed.
Ons sal, Here, tot U nader,
U gee ons weer nuwe moed.

2. Lam van God, berei ter slagting,
Voor u skeerders was U stom.
Deur u offer bring U redding -
U het ons tot heil gekom.
By U, Here, is vergewing,
lofsang vul u heiligdom.

3. U klee ons met bruilofsklere
vir die feesmaal van die Lam.
Tot U, allerhoogste Here,
rys gebede soos 'n vlam.
Ons sing, Here, duisend kere:
prys die Leeu uit Juda's stam.

4. Met ons harte vol verwagting
sal ons, Here, U ontmoet.
Met ons lied sal ons u lof sing,
ons sal met musiek U groet.
U kom maak by ons u woning,
oral straal ons vreugdegloed.

Geskiedenis

Teks
“Ons kom vier u maaltyd, Vader” is ’n nuwe teks van CJA Vos (#167) wat vir die melodie RHUDDLAN geskryf is. Dit is vir die eerste keer in die Liedboek (2001) gepubliseer.

Melodie
Die melodie RHUDDLAN wat by hierdie teks gebruik word, is ’n tradisionele Walliese melodie: Dowch i’r Frwydr (“Come to the battle”). Dit het in Edward Jones se Musical RelicksoftheWelshBards (eerste uitgawe, 1800; tweede uitgawe, 1805) verskyn. Die melodie is vernoem na ’n historiese dorpie naby die mond van die Clwyd rivier in Flintshire, Noord-Wallis.

Edward Jones (*Maart 1752, Llandderfel, Bala, Gwynedd, Wallis; †18 April 1824, Londen) gaan na Londen in 1775 om ’n musiekloopbaan te volg. Hy onderrig harp en word aangestel as harpspeler van die Prins van Wallis. Toe die prins die troon bestyg, word Jones bekend as die BarddyBrenin (die koning se sanger). Hy bly in die St James Paleis in 1805-1820. Jones publiseer ’n aantal boeke waaronder MusicalRelicksofthe WelshBards wat in 1794 (eerste uitgawe) en 1805 (tweede uitgawe) verskyn het sowel as oor die 200 Walliese Airs.

Bronne
CDH; e-poskorrespondensie met Cas Vos, 20 April 2016; HCLBW: 452; Knight: 94; PHH: 765-766.