Lied 296

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. Jesus, U is my verblyding.
Jesus, U troos in my lyding.
Jesus, inhoud van my lewe,
Jesus, einddoel van my strewe,
ek sing van u bloed en wonde;
weet hoe groot is al my sonde.
Wil my van u guns verseker
by die brood en by die beker.

2. Heer, U hoor al my gebede,
hoe ek sug en smag na vrede.
Ja, ook in my lofgesange
klink die toon van groot verlange.
Laat ek opstaan, laat ek lewe,
U het al my skuld vergewe.
Heer, wat my in guns bejeÎn,
breek die brood - ons vra u seën.

Geskiedenis

Teks
Die oorspronklike Duitse teks “Schmücke dich, o liebe Seele” is geskryf deur Johann Franck en die eerste strofe is in Johann Crüger se Geistliche Kirchen­Melodien (1649) gepubliseer. Die volledige teks verskyn in Crüger en Christoph Runge (1619-1681) se gesangboek D.M. Luthers und anderer vornehmen geistreichen und gelehrten Männer geistliche Lieder und Psalmen (Berlyn, 1653). Izak de Villiers (#153) het die Afrikaanse teks geskryf wat in die 1978-bundel gepubliseer is. Hy het die teks hersien vir die Liedboek (2001) en ingekort tot twee strofes.

Johann Franck (*1 Junie 1618, Guben, Brandenburg; †18 Junie 1677, Guben) was die seun van ’n advokaat. Sy vader het gesterf toe hy baie jonk was en hy is aangeneem en opgevoed deur ’n familielid. Hy gaan skool in Cottbus en Stettin en besoek daarna die Gymnasium in Thorn waar hy voorberei word vir studie aan die universiteit. Reeds op skool hou hy hom besig met poësie. Vanaf 1638 studeer hy regte aan die Königsberg Universiteit – die enigste universiteit wat nie geraak was deur die wanorde van die Dertigjarige Oorlog nie. Hy ontvang ook onderrig in poësie van Simon Dach (1605-1659). In 1645 keer hy terug na Guben om sy moeder te versorg, beoefen ’n regsberoep en beklee verskillende politieke ampte. In 1651 word hy burgemeester van Guben.

Franck was ’n vername digter op sy dag en sy kerkliedtekste asook sekulêre ge- digte was alom gewild. Hy was gereken as ’n toonaangewende liedskrywer in sy tyd en skryf om en by 110 liedere waarvan baie deur sy vriend, Johann Crüger, gepubli- seer is in verskeie uitgawes van sy Praxis Pietatis Melica. Al die liedere is ingesluit in die eerste deel van Franck se Teutsche Gedichte bestehend im geistlichen Sion (1674).

Sy liedere word deur verskeie tydgenote, onder andere Crüger, getoonset en die kantor van Guben gee selfs ’n onafhanklike Franck­Liederbuch uit. Johann Franck word naas Paul Gerhardt (#156) as een van die liedskrywers gereken wat die oorgang van die sogenaamde objektiewe Duitse kerklied na ’n meer persoonlike en mistiese teks bewerkstellig het.

Melodie
SCHMÜCKE DICH is geskryf deur Johann Crüger (#156) vir die teks van Franck en is vir die eerste keer gepubliseer in Geistliche Kirchen­Melodien (Berlyn, 1649). Sien ook Lied 295.

Bronne
Cillié: 505-506; HCLBW: 304; KLEG: 93-94; PHH: 451-452.