Lied 269

Ilse Pelem

Sections

Downloads

Vir Sang: ‘n PDF-dokument wat ’n melodielyn en lirieke bevat. In sommige gevalle bevat die dokument ook akkoorde.

Vir Begeleiding: ‘n PDF-dokument wat meerstemmige begeleiding vir orrel en/of klavier bevat. In sommige gevalle bevat hierdie dokument ook die lirieke van die lied.

Opname: Opname van van die lied, beskikbaar as mp3-lêer.

Aanbieding: ‘n Powerpoint aanbieding van die lied se lirieke.

Lirieke

1. God bly met u, waar u ook mag gaan.
Mag sy Gees u lei en heilig
en u altyd deur beveilig.
God bly met u, waar u ook mag gaan.

2. God bly met u, waar u ook mag gaan.
Deur sy sterke hand behoed Hy,
daagliks met sy manna voed Hy -
God bly met u, waar u ook mag gaan.

3. God bly met u, waar u ook mag gaan.
As ons struikel, trek die Vader
deur sy liefde ons weer nader -
God bly met u, waar u ook mag gaan.

4. God bly met u, waar u ook mag gaan.
In gevare, angs en lyding
bied sy almag ons bevryding -
God bly met u, waar u ook mag gaan.

Geskiedenis

Teks
Jeremiah Rankin was predikant van die First Congregational Church, Washington toe hy die liedteks “God be with you till we meet again” in 1882 geskryf het. Dit is gepubliseer in Gospel Bells (1883) met ’n refrein wat later weggeval het. Dit was ’n gewilde lied en het toegeneem in gebruik tydens die evangelieveldtogte van Dwight L Moody en Ira Sankey. By navrae oor die ontstaan van die teks, het Rankin bloot gesê dat die lied geskryf is om die oorspronklike en ware betekenis van die woord “goodbye” duidelik te maak: “God be with you”.

Die teks het in Suid-Afrika bekend geword deur die Nederlandse vertalings in die Zionsliederen (1871), Die Halleluja (1903) en die Afrikaanse vertaling deur GBA Gerdener in Die Nuwe Halleluja (1931). Die teks is gewysig deur Attie van der Colf (#164) in die 1978-bundel en hy het dit weer hersien vir die Liedboek (2001).

Jeremiah Eames Rankin (*2 Januarie 1828, Thornton, New Haven; †28 November 1904, Cleveland, Ohio) was ’n gegradueerde van Middlebury College in Vermont en die Andover Theological Seminary, Newton Center, Massachusetts. Hy dien as predikant in verskeie Congregational-kerke in New York, Vermont, Massachusetts, Washington DC en New Jersey (1855-1889). In 1889 word hy president van die Howard University, Washington, DC, ’n skool wat bekend is vir sy baie prominente Afro-Amerikaanse gegradueerdes. Rankin was een van die bekendste Amerikaanse predikers van die 19de eeu. Hy het drie volumes met poësie en liedtekste gepubliseer. Hiervan is “God be with you” die bekendste. Hy was medewerker by die samestelling van liedboeke soos The Gospel Temperance Hymnal (1878) en Gospel Bells (1880) en publiseer ook German­English Lyrics, Sacred and Secular (1897).

Melodie

Aanvanklik het Rankin twee persone gevra om ’n melodie vir hierdie lied te skryf. Een was “’n erkende musikant”, maar die melodie wat hy gekies het, was dié van William Gould Tomer (1832-1896). Alhoewel die gospelmelodie van Tomer (1882) wye populariteit geniet het, was dit te sentimenteel in karakter en is daar gesoek na ’n alternatiewe melodie. Dit is in die meeste moderne liedboeke vervang met RANDOLPH wat Vaughan Williams vir die teks van Rankin gekomponeer het. Die melodie is vir die eerste keer gepubliseer in The English Hymnal (1906) en is vernoem na die naam wat die familie gebruik het vir sy neef, Ralph Wedgewood, aan wie die Sea Symphony ook opgedra is.

Ralph Vaughan Williams (*12 Oktober 1872, Down Ampney; †26 Augustus 1958, St Marylebone, Londen) was ’n belangrike figuur in die Engelse kerkmusiek gedu- rende die eerste helfte van die 20ste eeu. Hy was die seun van die vikaris van Down Ampney. Hy begin sy studies aan die Royal College of Music in 1890 en studeer onder Walter Parratt (1841-1924), Charles Hubert Hastings Parry (1848-1918) en Charles Villiers Stanford (1852-1924). Hy verwerf ’n BMus-graad van Trinity College, Cambridge in 1894. In die volgende jaar ontvang hy ’n BA en keer terug na die Royal College of Music, waar hy ’n lewenslange vriendskap opbou met die komponis Gustav Holst (1874-1934). Van 1896 af was hy vier jaar lank die orrelis en koorleier van St Barnabas, South Lambeth Parish. Hy reis hierna na Berlyn waar hy onder Max Bruch studeer en na Parys waar hy by Maurice Ravel klas het. Hy voltooi in 1901 ’n DMus-graad aan Trinity College. Hy sluit aan by die Folk-Song Society in 1904 en bestee ’n aantal jare om volksliedere te versamel. Hierdie liedere was ’n ryk bron van melodieë vir versamelings waarvan hy die redakteur was: English Hymnal (1906), Songs of Praise (1925) en The Oxford Book of Carols (1928). Na die Eerste Wêreldoorlog, waartydens hy diens gedoen het in Masedonië en Frankryk (1914-1918), keer hy terug na die Royal College as professor in komposisie.

Bronne
Cillié: 470-471; Colquhoun: 259-260; CWC: 324-325; CWH: 393-394; PHH: 463-464.